அமெரிக்கா அதிபராக இரண்டாவது முறையாக பதவியேற்ற டொனால்ட் டிரம்ப், பல்வேறு அதிரடி மாற்றங்களை மேற்கொண்டு வருகிறார். சமீபத்தில், அவர் அமெரிக்க கல்வித் துறையை கலைக்கும் உத்தரவில் கையெழுத்திட்டதை தொடர்ந்து, தற்போது தேர்தல் நடைமுறையில் மாற்றங்களை செய்வதற்கான உத்தரவும் வெளியிட்டுள்ளார்.
இந்த புதிய உத்தரவின்படி, இனி அமெரிக்கர்களுக்கு வாக்களிக்க குடியுரிமையை நிரூபிக்கும் தேவையான ஆவணங்களை வழங்குவது கட்டாயமாக்கப்பட்டுள்ளது. மேலும் வாக்காளர் பட்டியல்கள் உள்ளிட்ட விவரங்களை சரிபார்ப்பதற்காக மத்திய அரசுடன் இணைந்து செயல்பட வேண்டும். இதை தவறினால் அந்த மாகாணங்களுக்கு மத்திய அரசின் நிதியுதவி வழங்கப்படாது.
முன்னதாக வாஷிங்டன் உள்ளிட்ட 18 மாகாணங்களில் தேர்தல் நாளுக்கு பிறகு வந்த அஞ்சல் வாக்குகளை ஏற்கும் நடைமுறை இருந்தது. ஆனால் இனிமேல் அஞ்சல் வாக்குகள் தேர்தல் நாள் முடிவதற்குள் பதிவு செய்யப்பட்டு ஏற்கப்பட்டிருக்க வேண்டும் என புதிய உத்தரவில் கூறப்பட்டுள்ளது.
மேலும், வெளிநாட்டு நிறுவனங்கள் மற்றும் வெளிநாட்டு நபர்களுக்கு அமெரிக்க தேர்தலுக்கு நன்கொடை வழங்கும் அனுமதி நீக்கப்பட்டுள்ளது. இதுகுறித்து டிரம்ப் கூறுகையில், “இந்தியா, பிரேசில் போன்ற நாடுகள் வாக்காளர் அடையாளத்தை பயோமெட்ரிக் தரவுத்தளத்துடன் இணைக்கின்றன, ஆனால் அமெரிக்கா இதுவரை குடியுரிமைக்கான சுய சான்றளிப்பை மட்டுமே நம்பியுள்ளது” என தெரிவித்துள்ளார்.
கடந்த 2020 தேர்தலில் டிரம்ப் தோல்வியுற்ற போது தேர்தலில் முறைகேடுகள் நடந்ததாக அவர் கடுமையாக குற்றஞ்சாட்டினார். இதனிடையே புதிய தேர்தல் விதிகள் அமல்படுத்தப்பட்டுள்ளன. ஆனால் தேர்தல் விதிகளில் மாநிலங்களுக்கு அதிக அதிகாரம் இருப்பதால் இந்த உத்தரவு சட்ட ரீதியான சவால்களை எதிர்கொள்ளும் என எதிர்பார்க்கப்படுகிறது.
அமெரிக்க குடிமக்களில் 9% பேர் அதாவது சுமார் 2.13 கோடி பேருக்கு குடியுரிமையை நிரூபிக்கும் தேவையான ஆவணங்கள் இல்லை. இதனால் இவர்களின் வாக்குரிமை பறிக்கப்படும் என்ற அச்சத்தில் வாக்காளர் உரிமைக் குழுக்கள் கவலை வெளியிட்டுள்ளன.
